Kryeministri Albin Kurti deklaroi sot se në Bruksel iu kërkua që të kalojnë në statusin e një diskutimi për respektimin e marrëveshjes bazike. Kurti ka hedhur akuza ndaj ndërmjetësuesit të dialogut, Miroslav Lajçak pasi sipas tij po bashkëpunon fshehurazi me presidentin serb, Aleksandar Vuçiq.
Kurti ka thënë se pas takimit iu ka dhënë një dokument për të cilin është thënë se është propozim i Serbisë për planin e sekuencimit por që ishte dokument i vjetër.
“Ju bëra të qartë që hapi i parë duhet të jetë dakordimi i një plani të sekuencimit. Propozimin e Serbisë nuk e dinim nuk mu dha asnjë dokument, pas diskutimeve të shumta mu soll një dokument që mu tha se është propozimi i Serbisë për planin e sekuencimit. Pasi analizuam kuptuam se ai dokument dukej se ishte dorëzuar para miratimit të marrëveshjes bazike dhe Serbia nuk kishte sjellur asnjëherë propozim për planin e sekuencimit, Lajçak e kishte fshehur këtë gjë”, deklaroi kryeministri, raporton Insajderi.
Sipas Kurtit, Lajçak dhe Vuçiq ishin dakorduar paraprakisht.
“Lajçak dhe Vuçiqi duket se janë koordinuar me një qëllim të vetëm që të bëjnë një skenar ku vetëm gjysma e marrëveshjes zbatohet përfshirë këtu edhe Asociacionin dhe ajo më e rëndësishmja të mos zbatohet asnjëherë.
Refuzimi im është logjik dhe tregues i respektit për vlerat e Bashkimit Evropian. Të thuash se një marrëveshje meriton të zbatohet vetëm në gjysmën e saj do të thotë se marrëveshja do të mbytet.
Pas daljës sime në media ku e ekspozova këtë skenar të pakuptimtë, Lajçak tha se Vuçiq e pranoj e Kurti refuzoj që është plotësisht i pavërtetë”, theksoi Kurti.