Anthony Joshua do të rikthehet në ring më 25 korrik, duke zhvilluar ndeshjen e tij të parë në vitin 2025. Ish-kampioni i dyfishtë i botës në peshat e rënda luftoi për herë të fundit me një kundërshtar elitar të kësaj kategorie në shtator 2024, kur u mposht me nokaut teknik nga britaniku tjetër, Daniel Dubois, brenda pesë raundeve, në përpjekjen e pasuksesshme për të fituar titullin IBF.
Pas një periudhe të gjatë jashtë ringut, Joshua nokautoi yllin e YouTube dhe boksierin e spektakleve Jake Paul në Miami në dhjetor të vitit të kaluar, përpara se të detyrohej sërish të mungonte.
Joshua ishte pasagjer në një aksident tragjik automobilistik pranë Lagosit, Nigeri, më 29 dhjetor 2025, ku humbën jetën anëtarët e ekipit dhe miqtë e tij të ngushtë, Sina Ghami dhe Latif “Latz” Ayodele. Pasi u rikuperua nga lëndimet, Joshua do të rikthehet në ring në një ndeshje që pritet t’i hapë rrugën përballjes së shumëpritur me Tyson Fury më vonë gjatë këtij viti, shkruan Sporting News.
Por çfarë dimë për Kristian Prengën, boksierin pak të njohur shqiptar që do të jetë përballë tij dhe që synon t’ua prishë planet të gjithëve?
Mosha e Kristian Prengës, rekordi profesional dhe përqindja e fitoreve me nokaut
Kristian Prenga është një boksier shqiptar i peshave të rënda, 35 vjeç, i cili jeton dhe stërvitet në New Jersey, SHBA.
Ai ka një rekord profesional prej 20 fitoresh dhe vetëm 1 humbjeje, ndërsa të gjitha 20 fitoret i ka arritur me nokaut.
Megjithatë, ky rekord mbresëlënës nuk është ndërtuar kundër kundërshtarëve të nivelit më të lartë. Gjatë karrierës së tij, Prenga ka qenë i planifikuar për ndeshje 10-raundëshe vetëm tri herë dhe nuk ka luftuar asnjëherë në distancën e plotë prej 12 raundesh për titull kampioni.
Në tri ndeshjet e fundit, ai ka fituar çdo herë me nokaut në raundin e parë. Para se t’i përkushtohej boksit profesionist, Prenga garonte në kikboks, përcjell Reporteri.net.
Fitorja më e rëndësishme e Kristian Prengës
Kundërshtari më i njohur që Prenga ka mundur është amerikani Joey Dawejko, i cili u tërhoq nga përballja e tyre në tetor 2024 për shkak të një dëmtimi në shpatull gjatë raundit të pestë.
Dawejko, një boksier shtatshkurtër dhe trupfortë, ishte angazhuar si partner sparingu i Anthony Joshuas për ndeshjen e tij fatkeqe kundër Andy Ruiz Jr. në vitin 2019.
Në një intervistë të vitit 2022 për YSM Sports Media, Dawejko refuzoi të komentonte zërat sipas të cilëve ai e kishte rrëzuar Joshua-n gjatë sparingut para humbjes së parë të karrierës së britanikut.
Pse po lufton Prenga me Anthony Joshuan?
Që nga fitorja spektakolare ndaj Dillian Whyte për titullin britanik të peshave të rënda në dhjetor 2015, Joshua pothuajse gjithmonë është përballur me kundërshtarë dukshëm më cilësorë dhe me më shumë arritje se Prenga. Përjashtimi i vetëm ishte ndeshja-show me Jake Paul.
Megjithatë, rrethanat aktuale e bëjnë një kundërshtar si Prenga një zgjedhje logjike.
Joshua ende po përshtatet me ekipin e trajnerëve të Oleksandr Usyk, me të cilët filloi bashkëpunimin për ndeshjen ndaj Jake Paul. Po ashtu, ndikim kanë lënë edhe ngjarjet tragjike të aksidentit të dhjetorit të kaluar.
Për këtë arsye, ndeshja e korrikut shërben më shumë për të parë se si do të reagojnë trupi dhe mendja e Joshua-s ndaj ngarkesës së stërvitjeve dhe presionit të natës së ndeshjes.
Rekordi i Prengës me 20 nokautë sjell mjaftueshëm rrezik dhe interes për tifozët e zakonshëm, ndërsa njëkohësisht është edhe një argument i mirë promovues për organizatorët. Menaxheri afatgjatë i Joshuas, Eddie Hearn, e ka përmendur disa herë këtë fakt.
Megjithatë, arsyeja kryesore mbetet përballja e madhe me Tyson Furyn, për të cilën të dy boksierët raportohet se kanë rënë dakord paraprakisht. Fury pritet të ngjitet gjithashtu në ring më 1 gusht kundër një kundërshtari teorikisht me rrezik të ulët. Pas më shumë se një dekade pritjeje, rivalët e vjetër nuk mund të lejojnë që kjo superndeshje të dështojë, sepse mund të mos realizohet më kurrë.
Çfarë tha Kristian Prenga për Anthony Joshuan?
Duke folur para konferencës zyrtare për promovimin e ndeshjes, Prenga u shpreh:
“Mendoj se ai e sheh këtë si një ndeshje për t’u nxehur para se të luftojë me Tyson Furyn. Por ajo ndeshje nuk do të ndodhë. Ai do ta anulojë përballjen me Furyn.
Ai është boksier i mirë, por më duket më i vogël sesa e prisja. Kalimi nga Jake Paul tek unë është si të kalosh nga 1 në 100.
Më vjen keq për atë dhe ekipin e tij për atë që ndodhi në aksident, por mendoj se kjo patjetër do ta ndikojë.”
Menaxheri i Prengës, Keith Sullivan, shtoi:
“Arsyeja pse zgjodhën Kristian Prengën është sepse patën një ditë të keqe dhe bënë një gabim në llogari. Kur e telefonova Kristianin për t’i dhënë lajmin e madh se po negocioja me Eddie Hearn dhe Matchroom për një ndeshje me Anthony Joshuan, biseda zgjati rreth 30 sekonda.
Ai më tha: ‘Po futem në palestër, duhet të stërvitem. E pranoj ndeshjen.’
Dhe aq ishte biseda.
Nuk folëm për paratë, nuk folëm për vendin ku do të zhvillohej ndeshja, as për datën. Ky njeri ka një vetëbesim të jashtëzakonshëm.”