Ka shpërthyer festa në stadiumin “Tehelne Pole”. Dardanët pas një përballje plot emocione kanë arritur të korrin fitore në Sllovaki me rezultatin 4-3.
Dardanët falë mobilizimit në pjesën e dytë arritën të dhuronin spektakël golash dhe emocione të forta. Ndeshja nuk startoi mirë për Dardanët të cilët pësuan gol në minutën e 6′. Martin Valjent shënoi golin e parë të ndeshjes me kokë.
Vendasin e morën epërinë shumë herët por Kosova reagoi shpejt me Veldin Hoxhën që shënoi në minutën e 21′. Me një goditje jashtë zone, Hoxha shënoi një super gol. Portieri tentoi të kapte por topi tronditi portën dhe ndezi atmosferën për “Dardanët”.
Sllovakia reagoi dhe shënoi golin e dytë në minutat e fundit të pjesës së parë duke dalë në avantazh. Lukas Haraslin shënoi golin e dytë për vendasit me një goditje jashtë zone në minutën e 45‘.
Dardanët mblodhën forcat në pjesën e dytë duke shënuar golin e barazimit. Ishte Fisnik Asllani i cili shënoi golin e dytë për Dardanët në minutën e 47′ duke e çuar rezultatin në 2-2.
Asllani me një goditje me kokë theu mbrojtjen e portierit vendas. Më pas Muslija shënoi në minutën e 60′ duke iu prishur festën vendasve dhe duke ndezur festën për Kosovën.
Kreshnik Hajrizi çoi rezultatin në 4-2 kundër Sllovakisë në minutën e 72′ duke e gjetur portierin të papërgatitur. Strelec në minutën e 94′ shënoi golin e 3-të për vendasit por pa rezultat pozitiv pasi fitoren e mori Kosova e cila do të përballet me Turqinë pas fitores ndaj Rumanisë.
‘Unë jam shqipe nga Kosova’! Dardanët festë nga dhomat e zhveshjes pic.twitter.com/knJJq0vuqI
— Euronews Albania (@EuronewsAlbania) March 27, 2026