Një operacion i gjerë dhe i koordinuar i Policisë së Kosovës ka çuar në prangosjen e autorit të dyshuar, Beshir Hamza për vrasjen e imamit në fshatin Zlipotok të Dragashit.
Ngjarja që tronditi mbarë opinionin publik ka vënë në lëvizje të gjitha strukturat e sigurisë, të cilat pas një pune intensive operative-hetimore të ndërmarrë pa ndërprerje, arritën të blindonin perimetrin ku fshihej i dyshuari.
Për shkak të terrenit specifik, policia aplikoi strategji të kombinuara të vëzhgimit dhe gjurmimit.
Detajet e këtij aksioni i ka konfirmuar zyrtarisht për Gazetën Insajderi, zëdhënësi i Policisë së Kosovës për rajonin e Prizrenit, Shaqir Bytyqi.
Sipas tij, lokalizimi i autorit të vrasjes u bë i mundur falë koordinimit të teknologjisë me njësitë elitare në terren.
“Në operacionin për lokalizimin dhe arrestimin e të dyshuarit janë angazhuar njësi të ndryshme policore, duke përfshirë përdorimin e dronit për vëzhgim nga ajri, si dhe njësinë policore me qen (K-9)”, ka deklaruar Bytyqi për Insajderin.
Sapo droni arriti të kapte lëvizjet e dyshimta nga ajri dhe njësia K-9 (qentë zyrtarë) ndoqi gjurmët e sakta në tokë, i dyshuari u rrethua dhe arrestimi i tij u krye me sukses.
I dyshuari është shoqëruar menjëherë në stacionin policor, ku po mbahet nën masa të rrepta sigurie.
Zëdhënësi Bytyqi ka bërë të ditur se ndaj tij do të vazhdojnë procedurat e mëtejme hetimore në koordinim të plotë me prokurorin përgjegjës të rastit, për të zbardhur motivet e këtij krimi të rëndë që ndodhi në Zlipotok.