Fisnik Asllani drejt Dortmundit? Interesi është konfirmuar, marrëveshja ende jo
Raportimet për një transferim të mundshëm të sulmuesit kosovar Fisnik Asllani te Borussia Dortmund kanë marrë hov gjatë ditëve të fundit.
Sipas gazetës gjermane BILD, Dortmundi ka rifilluar kontaktet me përfaqësuesit e Asllanit dhe e sheh atë si një nga alternativat për repartin ofensiv. Megjithatë, mediumi gjerman thekson se çdo lëvizje varet edhe nga largimet e mundshme të disa sulmuesve aktualë të klubit.
Raportimi i BILD është cituar edhe nga media të tjera gjermane si Bulinews dhe BVB Buzz, të cilat konfirmojnë ekzistencën e interesimit të Borussia Dortmundit për sulmuesin e Hoffenheimit.
Në ndërkohë, faqja Fansat e Futbollit Kosovar, duke iu referuar deklaratës së Enur Pakashticës në emisionin SportCast, ka raportuar se Fisnik Asllani tashmë ka arritur marrëveshje me Borussia Dortmund.
Megjithatë, deri në momentin e publikimit të këtij artikulli, nuk ka asnjë konfirmim zyrtar nga Borussia Dortmund, Hoffenheim apo nga vetë lojtari se marrëveshja është finalizuar. Për këtë arsye, pretendimi se transferimi është mbyllur mbetet ende i pakonfirmuar, ndërsa interesi i klubit gjerman për Asllanin është raportuar nga disa burime të besueshme në Gjermani./Kosova ime