Televizioni i njohur amerikan, CNN, ka publikuar pamje që nuk janë parë më herët e që janë incizuar nga kamera e vendosur në trupin e një militant të Hamasit.
Në video, militantët shihen duke kaluar dy rrethoja kufitare nga Gaza në Izraeli, duke vrarë një ushtar izraelit dhe një militant duke e incizuar veten duke festuar për vrasjet para se të qëllohet për vdekje në hyrjen e një baze ushtarake, përcjell gazeta “The Times of Israel”.
Pamjet që televizionit amerikan iu dhanë nga Forcat Mbrojtëse të Izraelit paraqesin një video të paedituar 100-minutëshe, të cilën e editoi pastaj televizioni, duke thënë se e ka vërtetuar vendin e incizimit.
Televizioni gjithashtu publikoi pamje ku shihen tunelet e Hamasit me armatim para fillimit të sulmit. Nuk do të thotë se ato pamje patjetër janë incizuar nga personi i njëjtë.
Videoja e incizuar nga kamera në trupin e një militant fillon me një shpërthim në rrethojën e kufirit dhe me thirrjen “Allahu Akbar” në mëngjesin e hershëm të 7 tetorit.
Personat e armatosur më pas shihen duke lëvizur me automjete për ta kaluar rrethojën. Një militant dëgjohet duke i thënë vozitësit: “Shko djathtas, shko djathtas”, shoqëruar me thirrjen “Allahu Akbar”.
Rrugët janë pothuajse bosh. Militantët pastaj shihen me armë të gjata e granata. Në pamje shihet se si i armatosur shkrep plumba drejt shtëpive izraelite në largësi.
Më vonë, militantët avancojnë nëpër një fushë të hapur, ku vërejnë dhe qëllojnë një ushtar izraelit. Ai është i vdekur në kohën kur militantët i afrohen.
Paralajmërim: Pamje të ndjeshme!
Exclusive: Video from Hamas militant shows early moments of the October 7 attack on Israel https://t.co/SHV5WKam4V pic.twitter.com/eef2d4MNSJ
— CNN International (@cnni) November 15, 2023
Më pas, militanti e kthen kamerën nga vetja, duke e thënë me krenari emrin e tij e duke shtuar se është baba 24-vjeçar. Ai thotë se ka vrarë dy ushtarë dhe i lutet Zotit për fitore.
Në pjesën e fundit të videos shihet ekipi i militantëve duke iu afruar bazës ushtarake në Re’im.
Përderisa militanti me kamerë në trup i afrohet portës dhe qëllon me armë në drejtim të bazës, ai bërtet, qartazi i goditur me armë nga një ushtar, dhe rrëzohet në tokë, duke u munduar që të largohet, por pamja e kamerës rrotullohet, duke e treguar ndërprerjen e lëvizjes së trupit./Nacionale