18.7 C
Pristina
24 Korrik, 2021 - 23:47

Macron para takimit me Kurtin, ‘i prerë’ me Kosovën dhe Serbinë

Presidenti i Francës, Emmanuel Macron ka ftuar Kosovën dhe Serbinë që të angazhohen si evropianë për të gjetur një kompromis, pasi siç ka thënë, vetëm në këtë mënyrë, Prishtina dhe Beogradi do të kthehen drejt një të ardhmeje evropiane.

“Unë i ftoj Kosovën dhe Serbinë për tu angazhuar si evropianë në gjetjen e një kompromisi që do t’i bëjë Beogradin dhe Prishtinën të kthehen drejtë një të ardhmeje evropiane”, ka thënë Macron, gjatë konferencës së përbashkët me kryeministrin e Kosovës, Albin Kurti, para Pallatit Elysee.

Macroni ka thënë se Kosova ka një interes të veçantë për Bashkimin Evropian dhe se Kosova do të ketë mbështetjen e shtetit të Francës në të gjitha proceset që do ta çojnë përpara këtë vend.

Kryeministri i Kosovës, Albin Kurti është në Francë, ku po pret të takohet me presidentin i Francës, Emmanuel Macron.

Në këtë udhëtim Kurtin do ta shoqërojnë edhe dy zëvendëskryeministrat, Besnik Bislimi dhe Emilja Rexhepi.

Kryeministri Albin Kurti sot do të takohet me presidentin e Francës Emmanuel Macron, i cili kishte provuar edhe më herët ta shtynte përpara arritjen e marrëveshjes ndërmjet Kosovës dhe Serbisë.

Në shkurt të këtij viti, në po të njëjtin vend ishte presidenti serb, Aleksandar Vuçiq. Më herët, aty kishte qenë edhe ish-kryeministri i Kosovës, Avdullah Hoti.

Macron, pas takimit me Vuçiqin pranonte se kryetema e takimit ishte dialogu Kosovë – Serbi, ndërsa theksonte se do të mbështeste zgjidhjet që propozoheshin nga presidenti serb, e të cilat presidenti francez i quante inovative.

“Patëm bisedime të besimit të plotë me presidentin Vuçiq sa i përket kësaj teme, dhe dua ta përshëndes përgjegjësinë që ka marrë ai disa herë për të propozuar disa zgjidhje që janë inovative. Jam i gatshëm t’i mbështes ato”, kishte thënë Macron.

Ai theksonte se do t’i mbështesë të gjithë ata që duan përparim në marrëdhëniet mes Kosovës dhe Serbisë.

“Llogarisni në mua, e unë do të vazhdoj të jem me ju derisa të arrijmë përparim në këtë rrugë, në rrugën e normalizimit, por edhe në rrugën që na sjellë stabilitet e paqe në rajon dhe e di se ky është synimi juaj”, shprehej Macron.

Të fundit

Të tjera nga rubrika

Hapësirë reklamuese