Konvertimet publike në kishat e Kosovës dhe të përshëndetura nga një lëvizje e themeluar para disa muajsh për braktisje të organizuar të fesë islame ka nxitur shumë reagime. Profesori Milazim Krasniqi thotë se ideja e kësaj lëvizjeje “është më shumë projekt serb dhe projekt pan-sllavist për me kriju përçarje”. Mënyra “brutale, e paedukuar, totalitare dhe afgane” e promovimit të Islamit viteve të fundit është shkaku i këtyre lëvizjeve sipas profesorit Blerim Latifi, të cilat i konsideron normale.
Një lëvizje që u themelua në Deçan në tetor të vitit të kaluar thotë se po angazhohet për veprimtari të gjerë shoqërore që i kontribuon “shqiptarizmit” dhe po i thërret shqiptarët myslimanë që ta lënë fenë islame dhe të konvertohen në katolikë.
Ndoshta jo të bindur nga kjo lëvizje, por disa myslimanë e bënë vërtetë këtë ditëve të fundit, dhe publikisht. Kjo shkaktoi jo pak reagim.
Paraditen e së dielës, në meshën e kishës “Shën Ndou” në Gllogjan të Deçanit dhjetëra persona iu nënshtruan sakramenteve të fesë së re, u pagëzuan dhe u kunguan.
“Unë e kam emrin Miftar”, u prezantua para disa mediave një i moshuar pas konvertimit. “Katragjyshi im e ka pasë Miftar; ma ka ngjitë mu. Unë jam dalë tash në fe të babgjyshit e katragjyshit”, tha Miftar Lekaj.
Anton Antoni, kryetar i bashkësisë lokale të Gllogjanit tha se mund të garantonte se për konvertimet “s’ka pasë asnjë organizim dhe nuk ka asnjë tendencë ndaj feve tjera”. “Këtu jemi të gjithë shqiptarë”, tha ai.
Konvertimet i kishte paralajmëruar Arbër Gashi, njëri prej udhëheqësve të Lëvizjes për Braktisjen e Islamit.
“Sot, nesër e pasnesër vazhdojmë me pagëzimet e planifikuara për muajin gusht. Numri i madh i të interesuarve për këtë proces është dëshmi e mjaftueshme për ndryshimin e madh që po ndodhë në vendlindje”, kishte shkruar ai të premten në një postim në Facebook.
Aty përditë po publikon postime dhe fotografi për të njoftuar për konvertimet e reja të personave nga vende të ndryshme, jo vetëm nga Deçani. “Sot edhe tri pagëzime të reja në Gllogjan! Urime!”, shkroi sot.
“Nuk ka fare dyshime, shqiptarët e KS janë 100% shqiptarë dhe së shpejti do jenë edhe 100% katolikë!”, shkroi Gashi në një tjetër postim.
Për pagëzime po njofton në Facebook edhe kisha “Shën Abrahami” në Llapushnik të Drenasit.
Një qytetare nga Prizreni u përball me plot komente, pasi shkroi të shtunën në Facebook: “Un së bashku me 24 pjestar të familjes time jemi Pagëzuar në qytetin tonë Prizren”. I publikoi edhe dy fotografi nga katedralja “Zoja Ndihmëtare”.
Imami nga Drenasi, Osman Musliu, i komentoi në Facebook konvertimet e së dielës, duke shkruar kështu: “Qesi R A S A D I, nja mos met ne fenë islame ne shqiptari ….!”.
Për profesorin e filozofisë së religjionit në Universitetin e Prishtinës, Blerim Latifi, këto lëvizje janë normale dhe se “shkaku pse këta njerez po e braktisin Islamin, duhet kërkuar te vetë mënyra se si Islami është promovuar viteve të fundit në Kosovë dhe Shqipëri”.
“Kosova eshte shtet demokratik dhe liberal. Çeshtja e fese nuk i perket detyrimeve ligjore, por lirive dhe te drejtave individuale te njeriut. Liria e besimit nuk nenkupton vetem te drejten me besu, por edhe te drejten mos me besu. Per me teper keto dy te drejta jane ligjerisht dhe moralisht te barabarta. Liria e fese nenkupton edhe lirine per me ndrru nje fe me nje fe tjeter, pa terhequr prapa sanksione ligjore e morale. Levizja e Deçanit mbledh njerezit qe duan me e realizu kete te drejte kushtetuese. As me shume e as me pak. Nderkaq, shkaku pse keta njerez po e braktisin Islamin, duhet kerkuar te vete menyra se si Islami eshte promovuar viteve te fundit ne Kosove dhe Shqiperi. Nje menyre brutale, e paedukuar, totalitare dhe afgane, në thelb. Shkurt e shqip: Ua keni gërditë Islamin, prandaj po ikin prej tij. Kjo eshte historia e vertete e kesaj pune. Te tjerat jane perralla”, shkroi Latifi të hënën në Facebook.
Kjo lëvizje në Deçan është “absolutisht abnormale”, sipas profesorit Milazim Krasniqi. Ai, në një ‘podcast’ të Bashkësisë Islame të Kosovës tha se “nëse ata duan me dalë prej islamit, janë të lirë, derën çelë e kanë”. “Islami bile-bile as nuk dobësohet, bile-bile, nganjëherë, mos me thënë, edhe pastrohet prej elementeve që kanë asi lloj konfuzioni”, tha Krasniqi.
Ai tha se anëtarët e kësaj lëvizjeje “s’paraqesin ndonjëfarë fuqie”. “Kur s’ka mujtë me e lëvizë këtë raport Ismail Kadareja me gjithë ata intelektualë, bash këta s’mujnë me tremb as macen prej përsheshi, qysh thotë populli. Por problemi është ky, po e krijojnë një ndjenjë të keqe”, tha ai.
Ai tha se ideja e lëvizjes në Deçan “është më shumë projekt serb dhe projekt pan-sllavist për me kriju përçarje”.
“Qeky grupi okult, grup i mbrapshtë, duhet me ditë se marrin një përgjegjësi të madhe sepse është absurd me u thirrë në emër të shqiptarizmit e me gërrmu bash në themelin e shqiptarizmit, pra me tentu me prishë harmoninë fetare, të cilën e kanë formu rilindasit dhe mbi atë bazë është formu kombi shqiptar dhe dy shtetet shqiptare”, tha Krasniqi. “Nuk kanë me pasë sukses”.
Veç këtyre që këtë të dielë i përfunduan ritet e konvertimit në Gllogjan, në kishën “Shën Ndou” u tha se edhe dhjetëra të tjerë janë regjistruar e po presin meshat e radhës që t’i nënshtrohen procesit të njëjtë.