17.1 C
Pristina
Wednesday, June 29, 2022

Gazetari rus shet medaljen Nobel për 103 milionë dollarë, paratë do t’i japë për Ukrainën

Kryeredaktori rus i gazetës së pavarur “Novaya Gazeta” ka shitur medaljen e tij të çmimit Nobel për Paqe për 103.5 milionë dollarë.

Dmitry Muratov tha se të gjitha paratë nga shitja do të shkojnë për të ndihmuar refugjatët nga lufta në Ukrainë, raportoi BBC-ja të martën.

Muratov u shpërblye me çmimin e paqes në vitin 2021 për mbrojtjen e lirisë së shprehjes në Rusi.

“Novaya Gazeta” pezulloi punën e saj në mars, menjëherë pas pushtimit rus të Ukrainës.

Kjo u bë pasi Moska tha se kushdo që i përshkruan veprimet e Rusisë në Ukrainë si një “luftë” do të përballet me gjoba të rënda ose mbyllje. Kremlini e quan Iuftën “operacion special ushtarak”.

Heritage Auctions, që është marrë me shitjen e medaljes, nuk ka zbuluar se kush ishte ofertuesi fitues.

Muratov ishte në mesin e një grupi gazetarësh që themeluan “Novaya Gazeta” më 1993, pas rënies së Bashkimit Sovjetik.

- Advertisement -

Që nga viti 2000, gjashtë gazetarë të gazetës dhe bashkëpunëtorë janë vrarë në lidhje me punën e tyre, duke përfshirë reporteren investigative, Anna Politkovskaya.

“Mesazhi më i rëndësishëm sot është që njerëzit të kuptojnë se po ndodh një luftë dhe ne duhet të ndihmojmë njerëzit që po vuajnë shumë”, ka thënë Muratov në një video të postuar nga Heritage Auctions.

Ai fitoi Çmimin Nobel për Paqen vitin e kaluar së bashku me gazetaren Maria Ressa, e cila bashkëthemeloi faqen e lajmeve në internet “Rappler” në Filipine.

- Advertisement -

Ressa dhe Muratov janë të dy të njohur për publikimin e hetimeve që kanë zemëruar liderët e vendeve të tyre dhe janë bërë simbole të luftës për lirinë e shtypit.

Të fundit
Lajme të lidhura